"Hi…Mornin!"
Yan ang araw-araw na bati ni auntie sa’ken. Karamihan sa mga oldies dito sa sg ay hindi gaanong nakakaintindi o nagsasalita ng English, or worse deadmahan na lang talaga dahil di kayo magkaintindihan.
Pero iba si auntie.
Nasa 4’8’’ lang yata ang taas niya. Medyo matambok na rin ang likod o sa tagalog, hukot o medyo nakuba na sa tagal siguro ng pagta-trabaho. Nakadagdag siguro ang pagiging hukot kaya mas maliit siya tignan. Meron syang maikling buhok na kulot. Nakasalamin at nasa 60-65 yrs old ang edad. Nung una ko syang nakita, naalala ko agad si nanay dahil hukot din ang nanay ko.
Masigla pang kumilos si auntie kahit alam kong matanda na sya. Siya ang naglilinis ng pantry, nagtatapon ng lahat ng basura ng trash bin sa bawat working area, nagpupunas at naglilinis ng kwarto ng mga boss, nagwawalis at minsan nagva-vacuum. Kalahating araw niya lang ginagawa lahat yon dahil nakakasabay namin siya minsan paglabas, kakain na kami ng lunch at uuwi naman siya.
Dahil nga natutuwa ako pag nakikita ko sya dahil naaalala ko si nanay, gustong-gusto ko syang bigyan ng kahit anong meron ako. Isang beses ko syang nabigyan ng tuna puff. Nung sumunod naman ay kasuy. Pero ang tagal bago niya tanggapin. Tapos mag te-thank you siya. kinwento ko si auntie sa highschool friend kong si Jermaine. Sabi niya, baka daw kasi wala sa kultura ng mga locals ang ganun, na may nagbibigay na foreigners. Ganown?! Tuloy minsan, nahihiya na rin akong alukin sya ng kahit ano dahil tanggi naman siya ng tanggi.
Kanina, nagtitimpla ako ng kape sa pantry, pumasok sya bigla at sinabing “hi, mornin!” tapos sabay tawa ng mahina at hinimas ako sa likod. Nagulat ako, at na-touch. Siguro dinaan na lang niya sa himas ang gusto niyang sabihin saken, kase nga hindi kame magkaintidihan. Hehe.
Paglabas ko ng pantry, kasunod ko rin sya sa likod ko. At pag-upo ko sa area ko, narinig ko syang kinausap yung kalbong finance controller sa opis. May sinabi siya in chinese sabay turo sa table ko, at biglang tingin naman saken nung finance controller. Hala, kaloka. Hindi ko naintindihan kung ano sinabi ni auntie.
Hay, namiss ko tuloy bigla ang nanay ko. . .
happy birthday sa Byernes (June12) NANAY!!!
